Claudine at Raymart naurong sa 2006 ang kasal

Hindi na matutuloy next year ang kasal nina Claudine Barretto at Raymart Santiago. Sa halip ay gagawin na lang ito sa July 20, 2006. Naurong ang dapat sana’y pagkakasal ng magsing-irog next year sa July 20 dahil susukob ito sa pagpapakasal naman ng kapatid ni Claudine sa susunod na taon. Nagparaya na muna ang aktres at si Raymart sa nabanggit na kasalan para hindi magsabay ang dalawang parehong event.

"Dapat nga talaga next year na kami papakasal. July 20 ‘yung plano namin.  Kaso magpapakasal din yung kapatid ni Claudine on the 16th same month, so nagbigay na lang si Claudine para sa kapatid niya.

"Hindi naman kasi maganda na susukob sa parehong taon and same month pa yung kasal, kaya nagbigay na lang kami.

"Napag-usapan naming, next-next year na lang.  Tutal, hindi naman kami nagmamadali at para mahaba rin yung preparation.

"Hindi naman ako na-disappoint.  Hindi pa siguro time. Okey lang," nakangiting pahayag ni Raymart.

Tiwala o trust ang rason kung bakit tumagal na ng dalawang taon ang kanilang relasyon ni Claudine. "Dapat may tiwala kayo sa isa’t isa.  Mahirap yung wala, eh.  Kunwari,  ako, walang trabaho. Siya, inaabot ng madaling araw sa shooting.

Kung wala kang tiwala, hindi ka makakatulog nang mahimbing.

"I guess, isa ito sa nabago sa akin – ang relasyon namin.  Kasi pag may trust ka sunud-sunod na yan.

"Malaki ang tiwala ko sa kanya kaya nagtagal kami. Two years na kami last November 5," nakangiti niyang balita.

Malaking bentahe rin kay Raymart ang hindi nito palaging paglabas sa mga showbiz columns kung kaya maganda ang daloy ng relasyon nila ng aktres.

"Hindi kasi ako visible sa mga intriga. Hindi ako napag-uusapan ng tao.  Yung iba kasi ‘pag sinabing good or bad publicity is still publicity.  Sa akin kasi ‘pag bad publicity, bad publicity talaga.

"Maganda na ‘yung hindi ako nai-intriga, walang napag-uusapan tungkol sa akin kaya hindi nagkakaroon ng isyu sa relasyon namin ni Claudine," paliwanag ng aktor.

***

Tatapusin lang ni Aubrey Miles ang kanyang kontrata sa ABS CBN 2 at susubukin raw niyang mag-audition para sa lalabas na serye ng "Darna" sa GMA 7. Hanggang May o April na lang raw ang kontrata ni Aubrey sa nasabing istasyon at nararamdaman niyang hindi na rin kukunin uli ng istasyon ang kanyang serbisyo kaya gusto niyang subukang mapabilang sa "Darna" series ng Siyete.

Nang nalaman ni Aubrey na nagpapa-audition para sa nasabing proyekto, nais sanang pumunta ni Aubrey pero nanaig ang respeto niya sa Dos. "Kahit pagbali-baliktarin mo, hindi magandang tignan na may show ako sa Dos tapos bila akong makikitang naga-audition sa GMA 7 although, doon naman talaga ako nanggaling. Respeto na lang yun sa kanila.

"Pag natapos na ang kontrata ko, saka na lang ako susubok kung meron pa," aniya.

May gustong ilahad si Aubrey tungkol sa pananatili niya sa ABS CBN.  Sa kapipilit namin, naibulalas niya ito sa pressscon ng lalabas niyang movie, ang "Pasiyam."

"Hindi ako nagtatampo, hindi ako nagagalit sa ABS, parang ang ano ko lang talent nila ako pero kung tirahin naman ako ng ‘The Buzz’ sobra naman.  Halos linggo-linggo silang may negative news tungkol sa akin.

"Hindi na lang respeto kundi kapamilya naman nila ako," himutok niya. Sinabi ni Nitz Miralles na ganun din naman ang GMA 7 na kapag may issue ang talent ng mga ito ginagawan din ng feature.

"Pero kasi iba yung inilalabas lang yung issue.  Pero yung gagawa ng istorya tapos pagdating sa huli wala naman pala, ganon," patuloy niya.

Nilinaw lang ni Aubrey na hindi masisibak sa ere ang TV sitcom na "Home Along Da Airport" kung saan siya mainstay.

"Na-tsismis dati na hanggang August na lang.  Eh, November na ngayon, nasa ere pa rin kami. Alam ko hindi.  Ewan ko lang kung anong plano sa taas," sey niya.

Tatapusin na lang daw ni Aubrey ang kontrata niya sa Dos.

"May option naman to renew the contract.  Ewan ko lang kung may balak pa silang i-renew ako.  Siguro kung wala, hindi ko na ipipilit ang sarili ko, baka hindi na nila ako kailangan.  Kung ganoon, ako na mismo ang gagawa ng paraan para lumuwag naman ang pakiramdam nila sa dami rin kasi namin.

"Pero malaki ang utang na loob ko sa ABS.  Dahil sa kanila nakilala ako nang husto hindi lang dito kundi sa abroad," ani Aubrey.

Isang retardate ang role ni Aubrey na ginampanan niya sa "Pasiyam" na dinirehe ni Erik Matti.

***

Lumantad na ang nagpapakilalang tunay na ina ni Carmina Villaroel na si Mrs. Pinky Lazatin. Hindi na namin pinagtakhan ang paglabas ni Mrs. Lazatin dahil matagal na naming alam ang tungkol dito.

Aksidente ang pagkaka-alam namin kay Mrs. Lazatin. Isang gym mate namin sa Slimmer’s Pasig ang naguguluhang nagtanong sa amin kung totoong patay na raw ang ina ni Carmina.

Base sa pagkaka-alam namin ay matagal nang pumanaw ang ina ni Carmina na madalas pa naming nakikita sa Regal Films noong kabataan pa ng aktres. Ito ang madalas na kasa-kasama ng aktres mula nang pumasok ito sa showbiz.

Itinanggi ito ng aming gym mate at buong ningning niyang sinabi sa amin na buhay ang nanay ni Carmina. Nakipagtalo pa nga kami sa aming kasama dahil ang pagkaka-alam nga namin ay patay na ang nanay ni Carmina.

Ipinagdiinan niyang buhay ang tunay na ina ni Carmina at ang namatay na nanay nito ay siyang adoptive mother lang raw umano ng aktres. Ikinuwento sa amin ng aming kasama sa gym kung paano niya nalaman ang tungkol dito. Isang kaibigan niya ang nagsama sa kanya sa isang government institution para bisitahin nito ang kaibigan niya. May nakita raw siyang palakad-lakad na babae sa nasabing lugar.  Mestizahin ang babae at bagamat may edad na ito mababanaag pa rin na may angkin itong ganda.

Sabi sa amin ng aming kaibigan, i-research namin ang tungkol dito at doon namin makikita ang umano’y tunay na ina ng aktres. Alam sa buong sulok ng institusyon na ito nga raw umano ang tunay na ina ni Carmina.

Sinabihan namin ang showbiz-oriented program na "S Files" sa GMA 7 na i-research ang tungkol dito. Dapat sana ay noon pa nailabas ng "S Files" ang tungkol dito pero nakiusap si Mrs. Lazatin na huwag muna siyang interbyuhin habang inaayos pa ang kanyang gusot. Natatakot rin si Mrs. Lazatin na ang paglantad niya ay magdulot ng mas maliit na tsansang matanggap siya nang buo ni Carmina.

Sa unang kaswal na pakikipag-usap ng "S Files" kay Mrs. Lazatin nabanggit nitong may nagbibigay umano sa kanya ng pera. Sa unang dinig namin, si Carmina raw umano ang nagbibigay ng pera sa kanya kapalit ng pananahimik umano nito sa tunay nilang relasyon.

Sa pangalawang kuwento, may ibang tao raw umanong nagbibigay ng salapi kay Mrs. Lazatin na inutusan umano ng aktres.

Bago pa humarap si Mrs. Lazatin sa "S Files", noon pa namin narinig ang kanyang pahayag tungkol sa mga ebidensyang ilalabas niya para patunayang siya ang tunay na ina ni Carmina. Pero noong mga panahong iyon hindi pa handa si Mrs. Lazatin sa kanyang gagawin.

Iginalang ng "S Files" ang pakiusap ng nasabing babae hanggang sa pumayag na itong magpa-interview. Gaya ng kanyang naipangako, nagsiwalat na si Mrs. Lazatin ng ilang detalye kung paano niya naging anak si Carmina.

Sa interview, sinabi niyang Feb. 22, 1975 nang ipanganak niya si Carmina. 

Dahil nga abala siya sa kanyang trabaho, ang umano’y batang si Carmina ay ipina-alaga ng kanyang tunay na ama sa isang nagngangalang Pastora na tiga-Tanuan, Batangas. Mula noon ay hindi na niya nakita ang kanyang anak.

Nong 1990 lamang umano nakita ni Mrs. Pinky ang isang bata sa "That’s Entertainment" na sinasabing tunay niyang anak.  At ito ay si Carmina na noo’y nagsisimula nang mag-artista. Ang pagsubaybay ni Mrs. Pinky sa programa ay galing sa isang taong nagsabi sa kanyang makikita niya ang anak sa nasabing programa kasabay ng pagbanggit ng pangalan ng aktres.

Mula noon ay pinangarap at inisip na ni Mrs. Lazatin na makilala ang anak. Ngayon lang siya nagkaroon ng lakas ng loob dahil sa pakiramdam niya ito na ang tamang pagkakataon.

Ilang media na ang nagtangkang ungkatin ang isyu, pero tinanggihan niya ang mga ito kahit inalok na siya ng malaking halaga. Naniniwala si Mrs. Lazatin na ang pagsisiwalat niya ay hindi kinakailangang tumbasan ng kahit gaano kalaking salapi. Maraming mga dokumento at pruwebang nakatago at inipon si Mrs. Lazatin para patunayang anak umano niya si Carmina, maliban pa sa testimonya ng ibang kaanak pati ng kanyang mga kamag-anak tungkol dito.

Hindi alam ni Mrs. Lazatin kung ano ang kahihinatnan ng kanyang paglantad kung makakabuti ba ito sa pangarap niyang makilala at makita nang harap-harapan si Carmina.

Sa ilang mensahe niya sa "S Files" sinabi niyang lalo siyang nahihiya at natatakot dahil sa kalagayan niyang ito ngayon baka hindi na rin siya tanggapin ng anak. Nagulo na ang buhay niya at nais naman niyang ituwid ang isang bahagi ng kanyang nakaraan ang malamang siya ang tunay na ina ni Carmina.

Ipinagdiinan ni Mrs. Lazatin na hindi siya nanghihingi ng pera mula sa kahit na sino o ‘di kaya umaamot sa suwerteng tinatamasa ng aktres. Hindi rin niya kasi hinahangad na tanggapin siya nito bilang ina.  Ang nais lang niya ay ipaalam ang katotohanan kay Carmina.

Kung anuman ang kahihinatnan ng paglantad na ito ng isa pang ordinaryong babae na umaangkin sa isa pang artista ay tanging kapalaran na lang ang makakapagsabi.

Kung maghaharap at magkikita nang personal sina Carmina at Mrs. Lazatin, yun ay nasa kanilang kagustuhan.

Maraming kaso na rin ng mga ganitong pag-aangkin ng isang ordinaryong tao sa celebrities. Nangyari na ito sa mga malalaking artistang gaya nina Nora Aunor, Vilma Santos at iba pa.  Ang pinaka-recent nga ay si Matet De Leon na nakaharap pa niya ang nagsasabing tunay niyang ina.

Pero hindi ito kinilala ng aktres at ang adoptive mother niyang si Nora Aunor ang itinuring niyang tunay na ina.