Nagsagawa ng pag-aaral ang Philippine Institute for Development Studies para sa bilateral free trade agreement sa pagitan ng Pilipinas at Estados Unidos upang magkaroon ng positibong impact sa ekonomiya ng bansa.

Ayon sa National Economic Development Authority, nakasalalay pa rin ang paglago ng ekonomiya sa direktang negosyo mula sa dayuhan at promosyon ng kalakalan. Natalakay sa ginanap na technical workshop ang posibilidad ng pagpapadala ng yamang tao para sa larangan ng electronics, pag-export ng tela, gayundin ang mga isyung legal dahil sa mahigpit na batas sa US.

Wala pang ugnayang nagaganap sa pagitan ng mga opisyal ng dalawang bansa ngunit sakaling mapag-usapan na ito, magbubunga ng malaki ang FTA sa paglago ng Gross Domestic Product (GDP), kalakalan at domestic prices.

Samantala, ang RP-Japan FTA ay nagbunga ng positibong kaganapan. Nauna nang pinahayag ni Pangulong Arroyo na hindi mga Pinoy nurse ang ipadadala sa Japan kundi mga caregivers at propesyunal sa Information Technology.

"Mali ang akala ng mga lobbyists at nurse organization sa Japan na mga nurse ang ipadadala," anang Pangulo.

Napag-alaman na kinakailangang makapasa sa Japanese qualification examination upang magkaroon ng mahabang taon ng pagta-trabaho roon. Higit sa lahat kailangang pag-aralan ang lengwahe o Nihonggo.

Hinihingi ng panig ng Pilipinas na alisin ang taripa sa asukal, manok, tuna, pinya at saging. Ayon kay Dr. Erlinda Medalla, PIDS Senior Research officer, ang bilateral agreement sa Japan ay magbubunga ng global competitiveness, paglago ng ekonomiya at mag-aahon sa kahirapan ng bansa. Higit na makikinabang rito ang 78,000 Pinoy sa Japan na nagta-trabaho bilang tsuper, manggagawa at nasa pabrika.

Ayon sa NEDA, ang mga bansang Amerika, China at Japan ang may malaking impluwensiya sa Silangang Asya kung kaya ang foreign policy ng Pilipinas ay kailangang naaayon sa konteksto ng Association of South East Asian Nations (ASEAN).