Kinakailangan na
mayroong malinaw na reporma sa istruktura para
solusyunan ang kahirapan at kawalan ng hanapbuhay
sa loob ng 6 na taon. Target nito ang $50-bilyon
eksport sa 2007 at 1.7-milyung trabaho kada taon
hanggang 2009.
Binatikos ng
ekonomistang si Solita Monsod ang MTPDP na aniya
ay mahirap mangyari. Subalit sinabi ni Neri na
ito’y sasamahan ng suporta mula sa 3 milyung
micro, small at medium enterprises at agribusiness
para matupad. Inamin ng kalihim na ang deficit at
malaking utang ang pangunahing banta para sa
istabilidad sa macroeconomy.
Dapat lang na ang
surplus ay 3.1 percent para maiwasan ang fiscal
deficit. Lalong dapat ay isaayos ang utang ng
National Power Corp. Ang inter-grid, intra-grid,
at inter-class cross subsidy ng NPC ay aalisin sa
darating na taong 2005 upang maalis ang distorsyon
sa presyo sa merkado. Sa gayon, bababa ang
binabayad na kuryente ng konsyumer sa industriya
at komersya.
Tataas naman ang
bayad sa kuryente ng mga residential consumers na
nagbe-benepisyo sa cross-subsidy. Sinabi ni Neri
na ipapatupad din ang "time-of-use pricing" kung
saan ang NPC at GENCO investors ay maniningil ayon
sa totoong halaga ng kuryente sa bawat araw.
Inaasahan na bababa
ang bayad sa kuryente dahil sa kumpetisyon at
sanhi ng pribatisasyon ng mga kumpanya at
pagtatayo ng Wholesale Electricity Spot Market (WESM),
kung saan ang mga end-users na may buwanang demand
na one megawatt ay makakabili ng elektrisidad
direkta sa generators simula Hulyo 2006 para sa
Luzon.
Ayon kay Neri nais ng
pamahalaan na makahabol din sa mga bansa sa Asya
na ang growth rates ay 6-8 % tulad ng Thailand,
6.4 %; Malaysia 7.8 %, at Vietnam 7.1%.
Ang pagbabayad sa
imprastraktura ay tataas ng PP100 bilyon sa
pamamagitan ng non-recourse project financing na
sasagawa ng Philippine Infrastructure Corporation.
Aayusin ang transportasyon at imprastrukturang
digital kabilang rin ang pag-aayos sa 2 milyong
ektarya para sa negosyong pang-agrikultura.
Bilang pagtugon sa
problema sa pinansiyal, aalisin ang dobleng
pagbubuwis; isasa-ayos ang pensyon at retirement
schemes ng nasa gobyerno. Ilan pang dapat ayusin
sa bansa ay ang hustisya, edukasyon, opurtunidad
para sa kabataan, paglaban sa katiwalian, reporma
sa burukrasya, kapulisan at hudikatura.
