Inihayag ng Bangko Sentral ng Pilipinas (BSP) na tumaas ng 8.7 na porsiyento o $6.2 bilyon, mula $5.7 bilyon ang remittances ng mga OFW sa unang siyam na buwan.

Tinataya ng BSP na mas tataas pa ito sa mga sunod na buwan o taon sa pamamagitan ng lalo pang pagdagdag at pagdami ng mga Pilipinong nakikipagsapalaran abroad. Dahil dito, inaasahan nilang malalagpasan nito ang 2004 target ng gobyerno sa OFW remittances.

Inaasahang tataas ang dollar inflows ng OFWs ng anim na porsiyento ngayong taon. 

Pinuri naman ni BSP Governor Rafael B. Buenaventura ang mga commercial banks sa pagkakaroon nito ng magagandang mekanismo sa remittance business. Aniya, sa pamamagitan ng mga bangkong ito, nawawala ang pangamba ng gobyerno na idaan sa informal channels ang mga remittance.

Dagdag ni Buenaventura, karamihan sa mga mataas na remittances ng mga OFW ay galing sa Hong Kong, Japan, Singapore, Italy, US, UK, Saudi Arabia at United Arab Emirates (UAE).

Sinabi rin ni Buenaventura na bumubuo ng 16 porsiyento ng current account receipts ng bansa at ng 11 porsiyento ng gross domestic product ang mga remittance ng tatlong kuwarto ng taon.

Maganda ang senyales na ito ayon naman sa OWWA dahil anila, lalo pang dumami ang mga Pilipinong na-deploy sa mga bansang Saudi Arabia, United Arab Emirates, Hong Kong, Japan at Italy. Anila, sa pamamagitan nito, mas madaragdagan pa ang remittances ng mga OFW at dahilan upang gumanda ang dollar flow ng bansa sa mga susunod pang mga taon.