NEW YORK (AFP) – Dinemanda si US diva Liza Minnelli ng kanyang dating chauffeur at bodyguard sa halagang 100 milyong dolyar, sa pagsasabing paulit-ulit siyang binugbog at pinuwersang makipagtalik rito, batay sa mga dokumento sa korte.

Nagsampa ng kaso si M’Hammed Soumayah laban sa 58 taong gulang na superstar sa New York State Supreme Court, at sinabing pinatalsik siya mula sa kanyang trabahong may sahod na US$238,000 bawat taon at nabigo rin umano siyang bayaran ng US$89,000 sa back wages.

Ayon kay Soumayah, 56 years old at may dalawang anak, paulit-ulit umano siyang sinaktan at binugbog ng Oscar-winning star ng "Cabaret" at pinuwersa sa relasyong sekswal.

Aniya, pinagtimpiian niya ang "violent outbursts" at sexual harassment mula sa aktres sa loob ng isang dekada dahil sa takot na mawala ang kanyang trabahong malaki ang sahod.

Sinabi ng retainer na sa loob ng 10 taong pagtatrabaho, siya, "without his consent, was forced to engage in sexual relations with Minnelli," na nakipaghiwalay sa kanyang huling asawang si David Gest noong isang taon.

Idinagdag pa niya na mayroon siyang "physical evidence of his sexual relationship with Minnelli. In the event that (Soumayah) resisted or protested, Minnelli would threaten him with termination," saad ng demanda.

"Throughout the course of his employment, (Soumayah) was hit and assaulted by Minnelli repeatedly," dagdag pa nito.  

Nagsampa ng hiwalay na demanda si Gest laban kay Minnelli noong isang taon, sa pagsasabing malala ang pagkakagalos niya dulot ng madalas na pagbugbog ng kanyang asawa, na aniya’y may kakaibang lakas kapag nagwawala’t lasing sa vodka.

Ani Soumayah, hindi makatarungan ang pagkakatalsik sa kanya noong Hunyo ngayong taon nang hindi inihahayag ang dahilan.

Nang malaman ni Minnelli na idinidemanda siya, nakipagkita siya sa kanyang dating chauffeur at umano’y nagwala, binugbog siya at kalauna’y kumalma at iniutos na makipagtalik sa kanya, pahayag pa ni Soumayah.

"When (Soumayah) told her it was wrong of her to fire him, Minnelli became violent and accused (Soumayah) of betraying her," ayon sa demanda.

"She spat on him and told him that (the late fashion designer) Halston (his previous employer) would have spat on him as well," dagdag pa rito.

Hinihingi ni Soumayah ang halagang 50 milyong dolyar sa damages para sa alleged assaults, 50 milyong dolyar sa damages para sa sexual battery, at $89,000 ng back wages, ayon pa sa demanda.

Wala namang komento ang publicist ni Minneli patungkol sa demanda at sa mga akusasyon dito.

Courtney Love inosente raw sa pananakit sa babaeng musician

LOS ANGELES (AFP) – Naghayag si US actress-singer Courtney Love ng kanyang pagiging inosente sa pananakit ng isang babaeng musician gamit ang whiskey bottle sa tahanan ng dating kasintahan nito.

Itinanggi ng 40 taong gulang na biyuda ni rock legend Kurt Cobain ang isang charge ng assault gamit ang nakamamatay na armas laban kay Kristin King sa madaling araw ng Abril 25.

Inutusan ni Los Angeles Superior Court Judge Terry Green si Love na bumalik sa korte sa Disyembre 15 upang magtakda ng petsa para sa kanyang criminal trial.  Nananatiling malaya ang dating Hole frontwoman sa bail na 150,000 dolyar.

Sinabi ni King sa korte noong isang buwan na binuhusan siya ng mang-aawit ng whiskey, binato ng bote sa kanyang ulo at ginalusan siya gamit ang mga kuko nito nang sugurin siya.

Pumatong ang isang "angry, vicious and erratic" Love kay King matapos nitong makita ang huli na natutulog sa couch ng dating kasintahan ni Love na si Jim Barber sa Los Angeles.

"(She) picked up a (Johnnie Walker) Red Label bottle of whiskey and dumped it all over me. She threw the bottle at the left side of my face," ani King.

Matapos nito’y "(Love) picked up a big candle that was lit and threw it at the back of my head."

Kalauna’y inupuan ng actress-singer si King, sinabunutan ito, ibinaon ang mga kuko sa braso nito, kinalmot ito, at dinakma ang kaliwang dibdib nito "(in the) worst pinch I ever had," pahayag ni King.

Ani King, nagawa rin niyang makatakas mula sa pagkakahawak ni Love at lumisan na may dalang cell phone na kanyang ginamit para tawagan ang mga pulis.  Agad na naaresto si Love.

Ayon sa umano’y biktima, nagdulot ng mga pasa, marka ng kuko, bukol sa likod ng kanyang ulo at napigtas na ngipin ang ginawang pag-atake sa kanya.Naghihintay din si Love ng pagdinig sa hiwalay na akusasyon ng drug possession na nagmula sa insidente noong Oktubre 2, 2003 kung saan inaresto siya sa labas ng bahay ni Barber matapos niyang basagin ang isang bintana nito.

Sa ikatlong kasong kriminal laban sa kanya, inamin ni Love noong Hulyo na may sala siya sa pagsasailalim sa impluwensiya ng droga at nasintensyahan sa drug rehabilitation program.

Madonna sa mga tropang Kano: Alis na sa Iraq

LONDON (AFP) – Sa bihirang pagtukoy sa mundo ng pulitika, nanawagan si US pop star Madonna sa kanyang sinilangang bansa na palisanin na ang mga tropang sundalo nito mula sa Iraq, nang kapanayamin siya ng British radio.

"I just don’t want American troops to be in Iraq, period," pahayag niya sa BBC Radio.

"My feelings are ‘can we just all get out?’," ani 46 na taong gulang na bituin, na ngayo’y naninirahan sa London kasama ang kanyang asawang si British film director Guy Ritchie, na nagsabing naniniwala siyang hindi makatutulong ang digmaang pinangunahan ng US upang malabanan ang terorismo.

"Global terror is everywhere. Global terror is down the street, around the block," ani Madonna.  

"Global terror is in California. There’s global terror everywhere and it’s absurd to think you can get it by going to one country and dropping tons of bombs on innocent people."

Pinakakilalang paniniwala ni Madonna ang pagsunod niya sa Kabbalah, isang panatang nakabase sa pag-aaral ng Hebrew texts na naging popular sa mga nakalipas na taon, lalo na sa music at film stars.

Sa ibang paksa, sinabi ng mang-aawit na ipinakita ng nakaraang US presidential election kung paano ang US society ay "becoming very divided."

"People are becoming very polarized," aniya. "We have people who don’t want to think, and who just want to guard what is theirs, and they’re selfish and limited in their thinking and they’re very fearful in their choices."

Sinabi ni Madonna na si Wesley Clark ang kanya sanang napili para sa pagkapangulo, na nadaig sa Democratic nomination ni John Kerry.

"I thought very carefully about it. I thought Wesley Clark had the best leadership qualities," aniya.

"If he had the same political experience as Kerry he could have bridged that gap."

Leonardo DiCaprio mercenary na

LOS ANGELES (AFP) – Isang pelikulang aksyon tungkol sa lumalaking papel ng mga mercenary sa mga digmaan ang ipo-produce at pagbibidahan ni US screen superstar Leonardo DiCaprio, ayon sa entertainment press.

Nais ng "Titanic" icon, na ngayo’y aktibo sa pulitika nang suportahan niya ang kampanya ng US presidential candidate na si John Kerry, na paghaluin ang mahahalagang elemento ng isang screen thriller sa tema ng outsourcing war, ani Daily Variety.

Isusulat ni Scott Burns ang nasabing pelikula, na popondohan ng Initial Entertainment Group at Beacon Pictures, na siyang magpo-produce ng pelikula kasama ang production firm ni DiCaprio na Appian Way.

Bida ang 29 taong gulang na si DiCaprio, isang masigasig na environmentalist, sa istorya ng buhay ni US billionaire Howard Hughes, "The Aviator," na ipinalabas sa North America noong isang buwan.

Hollywood isasapelikula ang nobela ni Garcia Marquez

LOS ANGELES (AFP) – Isasagawa na ng New Line Cinema sa Hollywood ang pinakahihintay na pelikulang bersyon ng best-selling novel ni Nobel Prize-winning author Gabriel Garcia Marquez na "Love in the Time of Cholera."

Nakuha ng studio ang rights sa 1985 novel mula sa producer na si Scott Steindorff, na nakipagkasundo kay Marquez sa isang multi-million-dollar deal.  Labinlimang taong tumanggi si Marquez na ibenta ang kanyang gawa sa Hollywood, ayon sa studio noong Nobyembre 8.

Napabalitang tinanggihan ni Marquez ang may 50 alok na gawing pelikula ang kanyang romantikong nobela.

"This is one of the world’s most romantic stories," ani New Line executive Mark Ordesky. "It is timeless, and its appeal knows no borders," banggit niya sa isang pahayag.

Isinasalaysay ng nobela ang istorya ni Florentino Ariza, na naghintay ng mahigit kalahating siglo para makamit ang kamay ng babaeng kanyang minamahal.

Si Oscar-winning writer Ron Harwood, na nagsulat ng screenplay para sa "The Pianist," ang siyang gagawa ng screenplay adaptation nito.

Sisimulan naman daw ng New Line, na nag-produce ng mega-hits gaya ng "Lord of the Rings" trilogy, sa lalong madaling panahon ang pagbubuo ng pelikulang bersyon ng nobela.