Malapit na ang Pasko pero marami sa ating mga kababayan ang hindi pa rin madama ang espiritu ng Kapaskuhan dahil sa hirap ng buhay. Patuloy ang pagtaas ng presyo ng mga pangunahing bilihin, wala nang katapusan ang pagtataas sa presyo ng produktong petrolyo at patuloy ang pagbagsak ng halaga ng ating salapi.

At habang naghihirap ang maraming Pinoy, nakakabwisit lang malaman na may mga opisyal ng gobyerno at ng military natin na yumayaman dahil sa pagnanakaw sa kaban ng bayan. Hanggang ngayon, wala pa ring nangyayari sa kaso ni Major General Carlos Garcia na nabuking na nagtatago ng milyun-milyong halaga ng salapi at ari-arian.

Bukod dito, nagdesisyon na rin ang Malacañang na payagan na ang mga kongresista na mabigyan ng pork barrel sa 2005 national budget. Nangangahulugan na ang bawat congressman ay muling makakatanggap ng 70 million na pondo para sa kanilang mga proyekto. Matatandaang tumanggi sila na magpabawas ng 40% sa kanilang pork barrel kahit na nakararanas na ang bansa ng fiscal crisis. At ngayong idineklara na ng Pangulong Arroyo na nalampasan na ng bansa ang fiscal crisis, muling binigyan ng "go signal" ang mga ito na itago ang kanilang pork barrel.

Commentary The Lito Nayan I Know Ang ating utang at ang international monetary fund

Dito lang ay kitang-kita na hawak sa leeg ng mga kongresista si Pangulong Arroyo. Alam kasi ng Pangulo na kapag hinarang niya ang pork barrel ay mahihirapan siyang maipasa ang mga bill na isinusulong niya sa Kongreso. "I scratch your back, you scratch mine," ‘ika nga. Ganyan ang pulitika sa Pilipinas. Nakakasuka.

Kagagaling ko lang sa Amerika noong nakaraang buwan para magbakasyon at mamasyal. Doon, ramdam na ramdam ko ang kahinaan ng ating salapi dahil sa sobrang taas ng presyo ng mga pagkain doon. Kung iko-compute mo ang halaga ng isang tanghalian doon, ulam, kanin, at softdrinks papatak ito sa P500.

Pero isa sa mga pinagkagastusan ko doon ay ang mga CD at DVD dahil mahilig talaga ako sa musika at pelikula. Pero nagulat ako sa presyo ng mga ito. Ang halaga ng isang CD doon ay nasa $18 pataas. Ang DVD na original ay nasa $20 pataas. Minsan, may sale na nagkakahalaga ng $10 – mahal pa din kung iko-convert mo sa peso – P560 din yun. Samantalang ang isang pirated na DVD ay nagkakahalaga lamang ng P90, minsan makukuha pa ng P60. At kasing linaw din ng orihinal ang pirated.

Kaya hindi rin natin masisi ang ating mga kababayan na tumangkilik ng mga pirated na DVD kahit na ito ay illegal dahil sa napakalayong presyo ng mga orihinal. Kamakailan ay nakausap ko si Optical Media Board Chairman Edu Manzano tungkol sa kabiguan ng kanyang grupo na masugpo nang ganap ang problemang ito. Ayon kay Edu, malaki ang problemang kinakaharap nila dahil may market na ng mga pirated DVD sa ating bansa – karamihan ng mga Pinoy na mahilig sa pelikula ay bumibili ng mga pirated DVD. Nangangamba rin si Edu na kung magpapatuloy ang ganitong ugali ng mga Pilipino, posibleng umaksyon na sa susunod na taon ang Amerika dahil sa paglipana ng mga piratang produkto rito. Isa raw sa binabalak gawin ng Amerika ay ang pag-pull-out ng ilan sa kanilang mga negosyo sa bansa bilang protesta laban sa gobyerno. At kung mangyayari ito, marami na naman sa ating mga kababayan ang mawawalan ng hanapbuhay. Bukod sa mga DVD, naglipana ngayon sa bansa ang mga pirated na pantalon, bag, damit, sapatos, pagkain at iba pa.

Pero ang dapat sisihin dito ay ang mga nagpapatupad ng batas. Hindi naman magiging ganito kalala ang sitwasyon kung hindi ito pinabayaan ng ating gobyerno. Sa madaling salita – pinabayaan din ng gobyerno na maglipana ang mga pirata sa bansa kung kaya nasanay na ang mga Pilipino na tumangkilik ng mga produkto nila. Hindi naman maglalakas loob na bumili ng mga pirated ang ating mga kababayan kung nakikita nilang hinuhuli ang tumatangkilik nito ‘di ba? Alam mo naman sa Pilipinas, hangga’t may kumikita – marami ang nakikinabang kahit na makasira na sa kinabukasan ng ating mga kababayan.

Mag-ingat po kayo sa pagbisita sa Pilipinas ngayong mga panahon dahil sa isang sakit ang kumakalat ngayon dito. Ito ay ang Meningococcemia. Isang uri ng bacteria na nanggaling sa strain ng meningitis na pangunahing sintomas ay tulad lamang ng isang trangkaso - pananakit ng katawan, pagtaas ng lagnat, pananakit ng ulo at lalamunan at pagsusuka. Bukod diyan makikita din sa maysakit ang mga rashes sa binti na kulay pula at purple. Delikado ang sakit na ito dahil sa loob ng 24 oras matapos na makaramdam ng mga sintomas, maaaring mamatay ang pasyente. Sa ngayon ay sinisikap na ng Department of Health na ma-contain ang sakit dahil sa pagdami ng mga naiulat na tinamaan ng sakit na ito sa Metro Manila at sa Baguio City kung saan may mga naiulat nang namatay.

Ayon sa mga doctor na ating nakausap, ang sakit ay nakukuha sa direct contact o sa secretions na galing sa may sakit nito tulad ng sipon at laway. Mas nakakahawa ang sakit sa mga kulob na lugar tulad ng mga dormitoryo, restaurants at sinehan. Kayat makabubuti na umiwas muna sa matataong lugar, ilublob sa mainit na tubig ang mga kutsara, tinidor at kutsilyo kapag kakain sa mga fastfood restaurants at uminom ng mga bitamina. At sa sandaling makaranas ng mga sintomas na nabanggit mas mabuting kumunsulta na kaagad sa doktor.

Para sa inyong suhestiyon o komento, mag-email sa julius_babao@abs-pinoycentral.com.