Matapos ang ilang taong hindi pagkikita, isang kapana-panabik na enkwentro ang nangyayari sa mga magkakaibigang nawalay ng napakatagal na panahon. At isa sa kapansin-pansin dito ay ang pag-uusap tungkol sa pagkakaroon ng ibang itsura ni ganito at ang lubusang pagpayat ni ganun. Dati-rati’y ang mga taong ito ang siyang nakikinig lamang sa mga usap-usapan tungkol sa pagpapaganda’t pagpapa-slim, subalit sa ganitong pagkakataon ay sila naman ang siyang pinakikinggan.

Sa sitwasyon ko, isa sa mga natutunan ko mula sa mga enkwentrong ganito ay ang naka-iintrigang pagtatanggal ng balde-baldeng taba sa katawan. Naririyan ang mga nagsasabing natuto na daw silang magbilang ng kani-kanilang mga calorie intake at mag-compute ng kani-kanilang mga body mass indices, basal at active metabolic rates. Naririyan din naman ang ilan na nagsasabing natuto na daw silang gumawa ng kanilang sariling fitness regimen kung saan sinisigurado nilang naa-achieve nila ang kanilang tamang heart rate habang sinasabayan ito ng aerobic exercises at stretching. Ang iba naman ay nagsasabing gumagamit sila ng tinatawag na breathing instrument na siyang tulad ng isang whistle o pito na binubugahan sa bibig ng mahigit sa apatnapung (40) beses araw-araw habang sa ilong naman humihinga. Naririyan din ang mga umamin sa paggamit o pagsubok ng ilang gamot na pampapayat.

May nagsasabing sumusunod daw sila sa tinatawag na Atkin’s Diet, na siyang inilunsad ng batikang doktor na si Dr. Robert Atkins at siyang ginagamit ng madaming taga-kanluraning bansa. Tulad ng South Beach Diet na tinatawag, ang teorya sa likod ng diet na ito ay ang mga pagkaing carbohydrates ang siyang nagdudulot ng pagpapataas ng insulin level sa katawan na siyang nagdudulot sa mga cells upang mag-store ng taba. Ang Atkin’s diet ay nagpo-promote ng pagkain ng mga pagkaing mayaman sa protina at pagbabawas ng carbs na siyang nagdudulot upang maglabas ang katawan ng tinatawag na ketones at siya ring signo na ang katawan ay nagsusunog ng taba. Subalit hindi madali ang paraan na ito dahil kinakailangan ng matinding pagbabantay sa kinakain at sa duration ng mga phases ng programa.

Ang higit na interesting na paraan ng pagpapapayat na aking nakalap ay ang simpleng regimen na tinatawag na LOW CARB DIET (LoCD) na maihahalintulad sa Atkin’s Diet. Ang teorya ng diet na ito’y habang nagda-digest ang katawan ay ginagamit ng mga muscles ang mga carbohydrates bilang energy fuels upang ma-repair ang mga tissue na nagamit sa ginawang activity. Kung walang activity, ang mga carbs ay naiipon na siyang nagiging taba. Kung lilimitahan ang pagkain ng carbs, mapipilitang gamitin ng mga muscles ang mga naipong taba sa katawan na siyang nagreresulta sa pagsusunog ng taba. Sa panahong ito, higit na mabisa ang mga gagawing ehersisyo sa pagpapayat.

Sa unang bahagi ng LoCD inaasahan ang matinding pagbabawas ng liquid sa katawan na siyang nagdudulot ng pagbabawas ng mahigit sa walong (8) pounds sa unang linggo. Ang unang bahagi na kailangang magtagal lamang sa loob ng dalawang (2) linggo ay panahon kung kailangan kailangang umiwas sa kahit anong pagkain na mayroong carbohydrate at sugar tulad rice, pasta, bread, noodles, whole grains, cereals, potatoes, cookies, biscuits, sweets, milk, dairies pati na din ang yogurt, at ilang mga fruits at vegetables. Kailangang gawin ito sa loob ng dalawang linggo upang hindi maapektuhan ang function ng inyong mga liver. Sa phase na ito, kailangan pa din kumain ng tatlong beses sa isang araw subalit limitahan lamang sa mga pagkain tulad ng meat, fish, poultry, eggs, nuts, green salad, at tofu.

Ang ikalawang bahagi ay kapag nakamit na ang patuloy na pagbabawas ng timbang. Subukan dagdagan ang intake ng carbohydrate subalit limitahan lamang ito sa pagkain ng ilang fruits at vegetables. Pagkatapos nito, mag-set ng target weight.

Kapag nakamit na ito, tumungo sa ikatlong bahagi kung saan kailangang i-maintain ang timbang na nais. Dagdagan ang dami ng carbohydrates subalit limitahan sa pagkain ng mga fruits, vegetables at paminsan-minsan complex carbs. Kasama ng ikatlong bahagi ay ang pag-inom ng madaming-madaming tubig, higit sa walong baso araw-araw, pagkakaroon ng 10-30 minute workout araw-araw at ang pagtulog ng 6-8 hours.

Ayon sa mga eksperto sa Rockefeller University, Cornell Medical College, at American Diet Association, higit na pag-aaral ang isinasagawa upang malaman ang epekto ng ganitong diet sa kalusugan. Habang ang madaming mga kakilala ang masayang-masaya sa resulta, ipinapayo na alagaan ang bahagi ng katawan na maaaring maapektuhan ng ganitong diet tulad ng liver at intestines. Bukod dito, maaaring magkaroon ng problema sa metabolism at dehydration.

Sa pag-aaral ng Harvard Medical School ang diet na ito’y mahusay sa pagpapababa ng cases ng pagkakaroon ng heart disease dahil ito’y nagpo-promote sa mga pagkaing dagat na mayaman sa omega 3 at polyunsaturated fatty acids. Mapapansin din na sa pagpapapayat na ito higit na mabilis ang pagbabawas ng timbang habang hindi naman nabibigla ang katawan sa transisyon na ginagawa ng diet. Kasama pa dito, maaaring kainin ang kahit anong pagkain liban nga lamang ang carbs na siyang magandang feature ng programang ito dahil hindi siya nagdudulot ng mental torture ng pagkain sa mga dieters.

Para sa mga ilang sumubok sa programa, napaka-epektibo, madali at masayang gawin ang LoCD. Kitang-kita nga naman sa napakalaking ipinagbago ng kanilang katawan pati na din ng kanilang pagdadala sa kanilang sarili na ang programa’y mahusay na paraan ng pagpapaganda.

--------

Kung may katanungan o suhestiyon, sumulat lamang sa wnangpi@silangan-shimbun.com.